Un motorista resultou ferido este luns nun accidente de tráfico rexistrado na entrada de Santiago de Compostela, despois de verse implicado nunha colisión cun turismo na rotonda de acceso á autovía AP-53.
Segundo confirmaron fontes do 112, o sinistro tivo lugar pouco despois das 10:00, á altura do quilómetro 337 da estrada N-525, nun dos puntos de conexión viaria coa capital galega.
O aviso á central de emerxencias foi realizado polos Servizos de Urxencias Sanitarias de Galicia-061, que informaron de que o condutor da motocicleta sufrira feridas tras caer do vehículo a consecuencia do impacto.
A partir desa comunicación, os operadores do 112 activaron o correspondente operativo e deron aviso á Garda Civil de Tráfico e á Policía Local, co obxectivo de atender a incidencia e regular a circulación na zona.
Polo momento, non transcenderon máis datos sobre o estado do motorista nin sobre as circunstancias concretas nas que se produciu a colisión co turismo.
