O home que permanecía espido nos soportais da Praza de Cervantes até o pasado sábado reapareceu nas últimas horas noutro punto do Casco Histórico de Santiago de Compostela, a escasos metros do anterior. Trátase dunha persoa sen fogar que, segundo confirman fontes veciñais, leva meses protagonizando incidentes na zona e xerando preocupación entre residentes e comerciantes polo seu comportamento e pola falta de hixiene no espazo público.
Os Servizos Sociais do Concello de Santiago interviron en varias ocasións para ofrecerlle roupa e aloxamento, sen éxito. Tal e como explican fontes municipais, o home ten rexeitado de maneira reiterada calquera tipo de asistencia, o que dificultou unha solución estable á súa situación.
Tras abandonar Cervantes o sábado, o home foi visto na rúa do Preguntoiro anunciando que marchaba da cidade. Non obstante, segundo publicou esta mañá El Correo Gallego, percorreu diferentes rúas do centro histórico buscando un novo lugar onde refuxiarse. Nun primeiro momento tentou permanecer nun establecemento de máquinas de venda automática, pero foi desaloxado polos responsables do local ao ser detectado polas cámaras de vixilancia.
Finalmente, decidiu asentarse nos soportais situados detrás da igrexa de San Bieito, no Cantón de San Bieito.
Segundo explicou a El Correo Gallego, un comerciante da praza de Cervantes, o traslado non se produciría por vontade propia. O home tería recibido unha orde xudicial de afastamento de 100 metros sobre a cafetería A Gramola, tras varios altercados rexistrados no local e as correspondentes denuncias presentadas polos seus responsables. A medida, decretada polo Xulgado de Santiago, manterase vixente ata a celebración do xuízo.
