O concelleiro de Facenda do Concello de Santiago, Manuel César Vila, manifestou este venres que espera que a Xunta “reconsidere a súa posición” sobre a subida do canon de Sogama e sinalou que o Goberno local prepara a nova ordenanza do lixo, que espera aprobar este ano e que entre en vigor o ano que vén.
En rolda de prensa, o edil denunciou que as tarifas de recollida pasarían “de 56 a 76 euros” por tonelada, o que “vai supor un gran impacto nas contas do Concello“. Neste contexto, Manuel César dixo esperar que despois de todas as alegacións e “de toda a presión existente de diferentes concellos”, a Xunta “reconsidere” esa formulación.
En todo caso, recoñeceu que, de manterse esa subida, os custos do servizo repercutiranse na cidadanía, aínda que o consistorio municipal aínda non calculou cal sería a contía final. Con todo, avanzou que o Concello vai elaborar unha nova ordenanza do lixo e, “por lei”, engadiu, deben “axustar o estudo económico á realidade dos custos que sexan”. “Esa é unha obrigación que temos, pero, en principio, non sabemos que vai pasar con este canon á espera do que considere a Xunta”, insistiu.
