Os profesores da Universidade de Santiago de Compostela (USC) Alberto Ruano Raviña e Cristina Candal Pedreira abordaron nun editorial titulado ‘Intelixencia artificial para a detección de artigos de fábricas de artigos’, publicado no British Medical Journal, a posible detección de artigos “fraudulentos” mediante técnicas de intelixencia artificial. En concreto, centráronse nas chamadas “fábricas de artigos”, empresas ás que miles de investigadores recorreron para mercar a autoría de artigos en revistas indexadas.
“Como resultado, miles de artigos foron retractados ata a data e estímase que un número moi elevado permanece sen detectar”, subliñaron. Segundo os autores, “estas empresas xeran manuscritos deseñados para pareceren artigos científicos lexítimos, a miúdo utilizando datos e imaxes falsificados, manipulados ou duplicados. A autoría destes manuscritos véndese a autores e envíanse a revistas científicas para a súa publicación coma se fosen artigos académicos xenuínos”.
Con todo, explicaron que detectar artigos procedentes de fontes fraudulentas segue a ser un desafío por varias razóns. En primeiro lugar, porque estes traballos están espallados por múltiples revistas e adoitan revisarse de maneira individual. En segundo lugar, porque a revisión posterior á publicación depende dun número relativamente pequeno de investigadores especializados; en terceiro lugar, porque algunhas revistas poden carecer dos recursos necesarios para detectar esta contaminación a gran escala; e, por último, porque moitos investigadores aínda descoñecen a dimensión do problema.
