A Xunta avanza na prolongación da autovía AG-59, que une Santiago e A Estrada, co izado das vigas do novo viaduto de Santa Lucía, en Teo. A previsión é terminar este ano este tramo que une A Ramallosa con Pontevea. Os traballos para instalar as doce vigas que soportarán o novo viaduto comezaron esta semana. Este venres instálase a quinta viga, coa previsión de ter todas colocadas a finais da próxima semana.
A conselleira de Vivenda e Planificación de Infraestruturas, María Martínez Allegue, supervisou este venres a actuación, onde remarcou que as obras deste tramo de autovía supoñen un investimento de máis de 33 millóns e permitirán habilitar 3,5 novos quilómetros O viaduto de Santa Lucía é unha das seis novas estruturas contempladas neste tramo de prolongación da AG-59, xunto con tres pasos inferiores e dous superiores. Tamén se proxectan ao longo do trazado variantes das estradas actuais e camiños de servizo.
Paralelamente, a Xunta xa ten en marcha a actuación da nova e última fase desta autovía, entre Pontevea e O Rolo, de 4 quilómetros. Conta cun investimento de máis de 30 millóns. O proxecto de trazado xa foi aprobado no Consello da Xunta e prevese licitar as obras para que se poidan iniciar este mesmo ano. Unha vez finalizados os 7,5 quilómetros da prolongación desta autovía, libre de peaxe, os tempos de viaxe entre Santiago de Compostela e A Estrada reduciranse a 10 minutos, ademais de mellorar a seguridade viaria, tras un investimento global de máis de 67 millóns. “Esta actuación da AG-59 facilitará a conexión e a vertebración territorial entre Santiago e a comarca de Tabeirós-Terra de Montes”, valora Allegue.
