A Asociación Galega de Editoras, en colaboración co Consello da Cultura Galega e a Xunta de Galicia, organiza o XXI Simposio O libro e a lectura, que terá lugar o próximo 18 de setembro na biblioteca do Consello da Cultura Galega, situada no Pazo de Raxoi. Este encontro, que se centrará no libro galego nas librarías, busca ofrecer unha análise e diagnose da súa situación actual e visibilidade en Galicia.
O simposio está dirixido principalmente a persoal de editoriais e librarías, aínda que estará aberto ao público ata completar o aforo. A xornada desenvolverase nunha única sesión de mañá e arrancará coa inauguración ás 10:30 horas.
Ás 11:00 horas, terá lugar unha mesa redonda sobre “O libro galego nas librarías”, que contará coa participación de Celia Fernández, secretaria da Federación de Librarías de Galicia, Carlos Blanco, das librarías Nobel, e Henrique Alvarellos, presidente da Asociación Galega de Editoras, quen exercerá como moderador.
Pola súa banda, ás 12:30, celebrarase un panel de experiencias titulado “Novas estratexias de comercialización”. Entre os relatores estarán Gexan Sors, das librarías Elkar, Àurea J. Perellò, das librarías Finestres, e Mariña de Toro, da libraría Numax de Santiago, que compartirán exemplos e propostas para mellorar a presenza e venda do libro galego.
Este simposio busca poñer en valor a industria editorial galega, promovendo un debate sobre como mellorar a súa difusión e comercialización no sector librario.
