O concelleiro do Partido Popular de Santiago, Adrián Villa, instou hoxe ao goberno local a mellorar a información dispoñible para a veciñanza sobre o servizo de recollida de enseres de gran tamaño nos colectores situados polo Ensanche e o Casco Histórico. Villa denunciou a “clara falta de información” que, segundo el, leva a que “todos os días aparezan mobles, electrodomésticos ou outros elementos voluminosos tirados nas rúas máis céntricas da cidade ao carón dos colectores”.
O edil popular subliñou que, “noutras cidades, o Concello coloca placas ou pegatinas nos colectores indicando o número de teléfono do servizo, co fin de que os veciños e veciñas saiban que contan con esta prestación”. Segundo Villa, isto evitaría a imaxe de mobles abandonados nas rúas, o que non só prexudica a veciñanza, senón tamén aos traballadores da empresa de recollida.
FALTA DE INFORMACIÓN PARA ESTUDANTES
Villa destacou tamén a necesidade de mellorar a comunicación sobre este servizo especialmente durante o inicio e o final do curso universitario, cando os estudantes, moitos dos cales descoñecen a existencia deste servizo, deixan enseres voluminosos ao lado dos colectores. “Observamos con claridade esa falta de información nestes períodos, xa que a maioría dos estudantes non teñen coñecemento sobre o servizo”, afirmou.
PROPOSTAS DE MELLORA
Entre as súas propostas, Villa demanda a creación dunha aplicación móbil ou dun formulario web para facilitar o acceso ao servizo, sen depender exclusivamente dun teléfono fixo. “Unha simple pegatina nos propios colectores cun código QR e o teléfono para a recollida destes residuos sería suficiente para que a veciñanza coñeza o servizo e así evitar esa mala imaxe que soportan veciños e visitantes”, concluíu o concelleiro popular.
Con esta solicitude, o PP busca que o Concello de Santiago tome medidas para mellorar a xestión dos residuos voluminosos na cidade, garantindo así un espazo urbano máis limpo e ordenado tanto para residentes como para visitantes.
