O líder do Partido Popular en Santiago, Borja Verea, visitou a Rúa do Carballo, situada na zona de Sar, acompañado polos concelleiros Olaya Otero e José Ramón de la Fuente, co obxectivo de coñecer de primeira man o estado da vía e recoller as demandas da veciñanza.
Durante o percorrido, os representantes populares mantiveron contacto cos residentes, que trasladaron as súas queixas polo estado do firme, caracterizado pola presenza de fochancas e irregularidades que dificultan a circulación. Segundo indicaron, a rúa leva décadas sen intervencións de mellora significativas.
Verea sinalou que se trata dunha vía que acumula arredor de 40 anos sen actuacións estruturais, unha situación que, ao seu xuízo, evidencia unha falta de atención a determinados barrios da cidade. “Estamos a falar dunha rúa que leva 40 anos sen unha actuación real”, afirmou, ao tempo que cualificou o estado actual como “vergoñento e impropio dunha capital como Compostela”.
O portavoz popular advertiu tamén das posibles consecuencias en termos de seguridade, especialmente en condicións meteorolóxicas adversas. “Non é só unha cuestión estética, é unha cuestión de seguridade”, indicou, en referencia ao risco que supoñen as fochancas para vehículos e peóns, sobre todo cando quedan ocultas pola chuvia.
Así mesmo, criticou a xestión do goberno local, formado por BNG e Compostela Aberta, ao considerar que existen deficiencias no mantemento das infraestruturas básicas. “Hai veciños que levan décadas esperando algo tan básico como poder circular por unha rúa en condicións dignas”, sinalou.
Na mesma liña, puxo en valor a insistencia da veciñanza para reclamar melloras e apuntou á necesidade de dar resposta ás súas demandas. “O mínimo que merecen estes veciños é respecto”, subliñou.
Por último, Verea instou ao executivo municipal a actuar na zona e a impulsar un plan de mellora e conservación das vías municipais, co fin de evitar situacións semellantes noutros puntos de Santiago. “Non se pode permitir que en Santiago haxa rúas ancoradas hai 40 anos”, concluíu.
