A Unión de Cidadáns Independentes de Galicia (UCIN) amosou a súa “profunda preocupación” polo estado de parálise do proxecto de humanización das rúas Estivada de Castelao e Camelias no Milladoiro, presentado polo goberno local como actuación prioritaria e cun investimento previsto de máis de dous millóns de euros.
Segundo lembrou o coordinador de UCIN, José Luis Calo, a iniciativa fora anunciada publicamente antes das últimas eleccións municipais, con prazos e obxectivos que “a día de hoxe non se cumpriron”. “As veciñas e veciños de O Milladoiro xa están cansos de anuncios baleiros. As obras públicas non poden ser simples ferramentas de propaganda electoral; son investimentos que pagamos todos cos nosos impostos e deben executarse con rigor, transparencia e prazos reais”, sinalou.
A formación denuncia que, dous anos despois da súa presentación, apenas se teñen producido trámites administrativos ou actuacións menores noutros puntos do municipio, pero non avances concretos na humanización destas rúas. Nesta liña, consideran que existe unha “sensación xeral de novo engano político”.
Desde UCIN Galicia reclaman tres compromisos fundamentais: un calendario claro e público coas fases da obra, un compromiso firme de financiamento e execución dentro do actual mandato e a participación veciñal no seguimento do proxecto.
O partido insiste en que continuará defendendo unha xestión municipal “centrada nas persoas e non nos intereses electorais”, para que tanto O Milladoiro como o conxunto de Ames dispoñan das infraestruturas e servizos que precisan.
