As obras do novo Colexio do Milladoiro comezarán esta mesma semana tras a sinatura da acta de replanteo. O proxecto, que terá un prazo de execución de 18 meses, permitirá que o centro abra as súas portas no curso 2027/28.
O edificio, con 4.886 m² construídos, será o primeiro en Galicia deseñado integramente segundo o Plan de nova arquitectura pedagóxica, que aposta por espazos máis amplos, polivalentes, respectuosos coa contorna e adaptados ao ensino do século XXI. A obra foi adxudicada á empresa Puentes y Calzadas Infraestructuras S.L.U. e suporá un investimento de máis de 11,6 millóns de euros por parte da Xunta de Galicia.
O centro dará resposta á crecente demanda de prazas escolares nun concello en continuo crecemento demográfico como é Ames, que suma poboación especialmente nas áreas limítrofes con Santiago.
DISTRIBUCIÓN E ESPAZOS DO NOVO CENTRO
O colexio contará con seis aulas de Infantil e 12 de Primaria, ademais de catro para apoio e desdobre de grupos, aula de música, sala de usos múltiples e un Polo Creativo. O deseño inclúe un foro central multifuncional, pensado como espazo de aprendizaxe aberto e conectado ao patio a través dunha gran fiestra.
A biblioteca terá acceso directo desde o vestíbulo e desde o exterior, mentres que o ximnasio, con dúas alturas, disporá de gradas e vestiarios. Haberá tamén comedor, zona de administración (despachos, conserxería, local para a ANPA) e espazos de servizos comúns.
No exterior, proxéctanse 1.974 m² de zonas cubertas e descubertas, entre elas unha pista polideportiva e espazos específicos para Infantil.
ACCESIBILIDADE E INTEGRACIÓN COA PAISAXE
A construción apostará por volumes baixos e integración na paisaxe, con boa iluminación natural e contacto visual cos patios e xardíns. A accesibilidade será universal e inclusiva, con ramplas, itinerarios libres de obstáculos e sinalética visible tanto no interior como no exterior. Incorporaranse tamén superficies podotáctiles para facilitar a orientación das persoas con discapacidade visual.
O anuncio foi realizado polo conselleiro de Educación, Ciencia, Universidades e FP, Román Rodríguez, e pola conselleira de Vivenda e Planificación de Infraestruturas, María Martínez Allegue, que destacaron o valor estratéxico deste proxecto para atender á veciñanza máis nova de Ames, en paralelo á promoción de 200 vivendas públicas previstas no municipio cun investimento de 41 millóns de euros.
