O Concello de Santiago puxo en marcha unha nova convocatoria de bolsas dirixidas a familias con menores que precisan apoio terapéutico ou que padecen celiaquía. A iniciativa, aprobada pola Xunta de Goberno e presentada pola concelleira de Dereitos e Servizos Sociais, María Rozas, conta cun orzamento de 70.000 euros para este 2025.
As axudas permitirán sufragar servizos como atención psicolóxica, logopedia, terapia ocupacional ou atención temperá, entre outros. Tamén se contempla o financiamento da alimentación sen glute para nenos e nenas con celiaquía, dada a diferenza de prezo destes produtos respecto aos habituais.
Segundo explicou Rozas, a convocatoria busca garantir a igualdade de oportunidades: “Moitas familias non poden asumir os custos que supón que un menor reciba a atención profesional que necesita. Con esta liña de bolsas queremos que todos os nenos e nenas teñan acceso temperán a tratamentos fundamentais para o seu desenvolvemento”.
As axudas cubrirán ata o 90% do gasto, cun límite máximo de 1.200 euros por menor, e poderán xustificarse os tratamentos realizados entre o 1 de xaneiro e o 15 de outubro de 2025. Os beneficiarios deberán estar empadroados en Santiago, acreditar a necesidade terapéutica mediante informe dun profesional colexiado ou a condición de celíaco, e ter unha renda anual familiar inferior a 36.000 euros (cinco veces o IPREM en 12 pagas).
O prazo de presentación será de 10 días hábiles a partir da publicación no Boletín Oficial da Provincia, e a tramitación deberá facerse a través da sede electrónica municipal ou do Rexistro Electrónico Xeral da rede SARA. Desde o departamento de Servizos Sociais habilitarase un servizo de atención para resolver dúbidas e acompañar ás familias no proceso de solicitude.
