Con motivo do 25N, a alcaldesa de Santiago, Goretti Sanmartín, e representantes de todos os grupos municipais participaron este luns nun acto no que se deu lectura a unha declaración institucional aprobada de forma unánime. Unha declaración que chama a reflexionar sobre a orientación e eficacia das políticas contra a violencia machista.
Tanto a rexedora como os concelleiros Mercedes Rosón (PSdG), Borja Rubio (PP), María Rozas (CA) e Míriam Louzao (BNG) participaron na lectura do texto, na que tamén interveu o alumnado do IES Eduardo Pondal coa lectura de varios textos contra a violencia machista.
En concreto, a declaración subliña a necesidade de “intensificar os traballos na prevención da violencia machista que ten no feminicidio a súa máxima expresión”, así como “concentrar esforzos na educación e na eliminación dos micromachismos”.
Durante o acto, os responsables políticos lembraron o tres feminicidios rexistrados este ano en Galicia, os cales “acrecentan o cómputo de mulleres asasinadas en Galicia desde o inicio das estatísticas no ano 2003 ata máis de 70”.
Neste contexto, a Corporación municipal comprometeuse a “dedicar os recursos necesarios a traballar a favor da igualdade e pola eliminación da violencia contra as mulleres” e referiuse a algunha destas medidas. Como destinar o 1% do orzamento municipal á prevención da violencia machista e á prestación de servizos de atención ás vítimas, entre outras.
Con todo, a declaración tamén lembrou o “compromiso” do Concello co ‘Pacto de Estado contra a Violencia de Xénero’ no seu papel como “primeiro punto de acceso, apoio e asesoramento para as mulleres vítimas de violencia machista e as súas familias” e instou á Xunta a “incrementar o orzamento destinado aos Centros de Información ás Mulleres”.
