Un home tivo que ser excarcerado este sábado tras saírse da vía e caer por un terraplén cun vehículo en Vedra. Foi o único implicado. Segundo informou o 112, o accidente rexistrouse despois das 11.30 horas, no quilómetro 7 da DP-8203. Foi un particular o que se puxo en contacto co servizo de emerxencias e trasladou que un coche caera por un pequeno barranco, de maneira que quedou envorcado, co condutor ferido e sen ser capaz de saír del.
O 112 compartiu a información con Urxencias Sanitarias de Galicia-061, cos bombeiros de Ordes, co GES de Brión e coa Garda Civil de Tráfico. Os membros do GES tiveron que empregar material de excarceración para liberar á vítima, que logo sería atendida na ambulancia polo persoal sanitario.
