A Xunta de Galicia e o Concello de Vedra veñen de asinar un convenio de colaboración para levar a cabo obras de mellora na escola infantil municipal do municipio. O acordo establece que o Executivo autonómico achegará 75.000 euros para financiar a actuación, mentres que o ente local asumirá a contratación e o seguimento dos traballos.
Segundo a información trasladada pola Xunta a través dun comunicado, o proxecto inclúe diversas intervencións no interior e no exterior do edificio. Entre elas atópanse a colocación de estores nas xanelas, a substitución do chan actual por formigón puído, a instalación dun falso teito con novas luminarias, así como o pintado das paredes interiores. Ademais, está prevista a instalación dunha nova marquesiña, co obxectivo de mellorar as condicións de uso e acceso ao centro.
O convenio recolle tamén que será o Concello de Vedra o responsable de xestionar o proceso administrativo e técnico das obras, que deberán estar finalizadas ao longo do próximo ano, conforme aos prazos establecidos no acordo asinado entre ambas administracións.
Desde a Xunta sublíñase que esta intervención se enmarca no seu compromiso coa atención á primeira infancia e co apoio á conciliación das familias, a través de investimentos destinados á mellora dos centros de educación infantil de 0 a 3 anos. Neste contexto, o Goberno galego lembra tamén outras medidas en marcha, como a gratuidade deste tramo educativo, orientadas a facilitar o acceso das familias a estes servizos.
