A portavoz de Industria do Grupo Socialista, Patricia Iglesias, advertiu hoxe sobre o perigo de converter a antiga mina de Pedra Facha, situada na parroquia de Niveiro, en Val do Dubra, nun vertedoiro a ceo aberto. A deputada presentou unha pregunta oral na Comisión de Industria do Parlamento galego, na que instou á Xunta de Galicia a escoitar á cidadanía e a non dar luz verde ao proxecto.
Iglesias lembrou que tanto o concello de Val do Dubra como o de Trazo expresaron o seu apoio á veciñanza e solicitaron que a Xunta non emita unha Declaración de Impacto Ambiental favorable para o proxecto. A parlamentaria mantivo un encontro co alcalde de Val do Dubra, o socialista Diego Luis Díaz, e representantes da asociación veciñal de Niveiro, que tamén seguen de preto o debate.
“A veciñanza e os concellos afectados xa fixeron pública a súa oposición a esta iniciativa”, destacou Iglesias, quen alertou dos importantes prexuízos para as vivendas situadas a menos dun quilómetro da mina e para as explotacións gandeiras e agrícolas a uns 800 metros de distancia.
A parlamentaria lamentou que a Xunta “non escoita á veciñanza nin aos concellos que se opoñen a este proxecto” e sinalou que a falta de planificación da Xunta está convertendo á industria mineira galega nun “xigante con pés de barro”. Iglesias insistiu en que calquera proxecto debe garantir a sostibilidade medioambiental, económica e social para contribuír ao desenvolvemento de Galicia como rexión industrial avanzada.
