Unha persoa faleceu este luns nun accidente cun tractor en Val do Dubra, despois de quedar atrapada baixo o vehículo que conducía. O suceso produciuse en Portomedal, na parroquia de Coucieiro, segundo a información facilitada polo 112 Galicia.
O accidente tivo lugar arredor das 20:40, cando, por causas que non transcenderon, o tractor se desviou cara a un camiño e acabou envorcando. Como consecuencia do sinistro, a persoa que manexaba o vehículo quedou atrapada.
Tras recibir o aviso, o 112 mobilizou os profesionais de Urxencias Sanitarias de Galicia-061, ademais de comunicar o ocorrido á Garda Civil e á Agrupación de Voluntarios de Protección Civil de Val do Dubra.
Os efectivos de emerxencias desprazáronse ata o punto do accidente, situado neste municipio da comarca de Santiago, pero á súa chegada xa non puideron facer nada por salvar a vítima e confirmaron o seu falecemento.
