O concello de Val do Dubra iniciou esta mañá unha nova edición das Feiras de Abril, cun acto inaugural no que participou o subdelegado do Goberno na Coruña, Julio Abalde, acompañado polo alcalde, Diego Díaz. A apertura tivo lugar na carpa do Mercado de Artesanía e comercio local situada en Bembibre, un dos espazos centrais da programación.
Durante a primeira xornada déronse cita expositores da contorna, artesáns e profesionais vinculados aos sectores gandeiro e agrícola, nun encontro que combina actividade económica, divulgación e lecer. A programación estenderase ata o vindeiro luns, consolidando esta cita como unha das máis relevantes do calendario local.
No acto inaugural, Julio Abalde salientou o papel deste tipo de iniciativas na posta en valor do medio rural e no impulso da actividade económica. “As Feiras de Abril son un exemplo do dinamismo do rural galego e da importancia de preservar e promover as nosas tradicións como motor de desenvolvemento local”, afirmou.
O evento ofrece unha programación variada que inclúe mercado de artesanía, exposición de gando, demostracións de oficios tradicionais, talleres e actuacións musicais. Estas propostas converten durante varios días a localidade nun punto de encontro para veciñanza e visitantes arredor da cultura e das tradicións do rural galego.
