O presidente do Partido Popular de Galicia (PPdeG), Alfonso Rueda, comprometeuse este sábado a facer realidade os proxectos da Xunta en Teo ao longo da actual lexislatura. Durante a reunión anual do PP local, Rueda destacou o traballo da alcaldesa, Lucía Calvo, á fronte do goberno municipal e afirmou que o concello ten “moitísimo futuro”.
No encontro, no que tamén participaron o portavoz do PP no Congreso, Miguel Tellado, e o presidente provincial do PP da Coruña, Diego Calvo, Rueda sinalou que en Teo “respírase outro ambiente” dende hai dous anos e que o concello necesitaba “un revulsivo para saír da parálise na que estaba”.
O líder do PP galego eloxiou a alcaldesa, asegurando que é unha persoa que “non acepta un non por resposta” e que “o único que quere é protagonismo para o concello que goberna”.
Pola súa banda, Diego Calvo destacou a “dificultade” de recuperar a alcaldía dun concello e felicitou a agrupación local polo traballo realizado. Segundo explicou, o PP en Teo está a desenvolver un “proxecto de estabilidade e seriedade” pensado en exclusiva para os veciños.
O presidente provincial tamén sinalou que o concello está agora “apartado de leas de tripartidos” e diferenciouno dos gobernos anteriores conformados por BNG, PSOE e mareas, asegurando que estes son “os modelos de goberno que os galegos rexeitan dende hai anos”.
No acto tamén estiveron presentes a conselleira de Política Social, Fabiola García, e o conselleiro de Facenda e Administración Pública, Miguel Corgos, entre outros cargos do partido. O encontro serviu como unha reafirmación do compromiso da Xunta co concello e coa continuidade dos proxectos en marcha.
