O Pleno Municipal de Brión aprobou esta mércores os Orzamentos Municipais para 2024, cun importe total de 7.771.316,63 euros, representando un incremento do 6,88% respecto ao ano anterior. Segundo a voceira municipal, Sandy Cebral, estes orzamentos son “equilibrados e cumpren con todas as regras esixidas polo Estado; realistas e sociais, incrementando as partidas destinadas aos distintos servizos á veciñanza; e investidores, duplicando a partida de investimentos reais”.
A discusión dos orzamentos tivo lugar nun contexto de apertura, sendo os primeiros na historia do Concello que se debaten publicamente con todas as forzas políticas. A pesar do diálogo, a aprobación non foi unánime, contando co apoio de PSOE e PP e o rexeitamento de BNG.
No que atinxe aos detalles dos orzamentos, o gasto en persoal diminúe un 0,98% en comparación con 2023, mentres que o gasto corrente aumenta un 2,34%, alcanzando os 3.057.656,21 euros. Isto representa o 39,35% do orzamento total, destinado ao mantemento dos servizos básicos. A partida máis destacada é a de Investimentos Reais, que crece un 51,54% ata os 1.200.055,78 euros, con financiamento para diversos proxectos clave, incluíndo a pavimentación do acceso a Gosende e o plan de mellora de acceso a parcelas agrícolas.
As novas incorporacións ao orzamento inclúen 15.000 euros para a ampliación da rede municipal de abastecemento e saneamento en Brans de Abaixo e 22.500 euros para obradoiros de emprego. Tamén se destina orzamento para melloras no CEIP de Pedrouzos e actuacións na Carballeira de Santa Minia.
O debate no pleno revelou a división entre os grupos, co BNG criticando a falta de novidade e asemellanza co orzamento do ano anterior, mentres que o PP agradecía a inclusión das súas propostas. A pesar das diferenzas, o alcalde Pablo Lago expresou o seu compromiso de seguir traballando en conxunto e chegar a máis acordos que beneficien ao concello.
