A Xunta de Galicia abriu o período de información pública para a solicitude de declaración de utilidade pública e necesidade de urxente ocupación da modificación do proxecto do parque eólico ‘Olerón’, situado entre os concellos coruñeses de Rois e Brión.
Segundo recolle o Diario Oficial de Galicia (DOG), os cambios afectan a un centenar de propietarios dos terreos incluídos no ámbito do proxecto, promovido pola empresa Norvento. A principal variación consiste na reducción de oito a seis aeroxeradores, o que implica unha potencia total instalada de 27 megawatts, con 4,5 megawatts por unidade, e unha potencia evacuable de 24 megawatts.
O investimento previsto ascende a 18,5 millóns de euros, e o prazo estimado para a execución das obras é de oito meses, segundo a documentación publicada pola Consellería de Medio Ambiente e Cambio Climático.
Esta fase de exposición pública permitirá a presentación de alegacións por parte dos titulares afectados e da cidadanía en xeral, antes de que o proxecto poida obter a súa declaración definitiva de utilidade pública, requisito previo á execución das obras e á ocupación dos terreos necesarios para a súa construción.
