O Pleno Municipal de Brión aprobou este mediodía por unanimidade reiterar a solicitude á Xunta de Galicia para que a Romaría de Santa Minia sexa recoñecida como Festa de Interese Turístico de Galicia. O acordo reproduce o adoptado en abril de 2024, mais nesta ocasión incorpora unha memoria explicativa ampliada coa intención de reforzar a xustificación do arraigo e da singularidade da celebración.
No anterior proceso, a comisión avaliadora da Xunta concluíra que non quedaba acreditado de maneira suficiente o vínculo da romaría coa veciñanza nin a súa especificidade. Para dar resposta a estas observacións, o Concello sumou documentación complementaria ao informe histórico elaborado por Clodio González, membro da Real Academia Galega. Entre o material achegado figuran máis de 1.200 sinaturas de veciños e veciñas de Brión, recollidas en decembro en cinco días, así como fotografías, libros, recursos gráficos e audiovisuais que amosan a continuidade da festa ao longo do tempo.
Tamén se incorporaron informes adicionais, como o do párroco de Brión, José Luís Dorelle Iglesias, que destacou que a devoción a Santa Minia naceu no século XIX do impulso da comunidade laica brionesa, sen depender estritamente da xerarquía eclesiástica. A memoria inclúe ademais novas imaxes de grupos veciñais participando na romaría desde comezos do século XX, co obxectivo de evidenciar o seu carácter popular.
OUTROS ASUNTOS DO PLENO
A sesión desenvolveuse con celeridade e apenas debate. A corporación aprobou por unanimidade a actualización dun 1,87% da taxa polo saneamento e depuración de augas, porcentaxe equivalente ao 85% do IPC interanual e que se aplica desde a sinatura do convenio de prestación do servizo en 2012.
Por outra banda, foi rexeitada unha moción do BNG sobre a vaga de lumes forestais do pasado mes de agosto. O texto obtivo dous votos a favor (BNG), cinco abstencións (PSOE) e tres en contra (PP). A voceira municipal, Sandy Cebral, explicou que o Goberno local comparte a preocupación polas consecuencias dos incendios mais considerou que “o Parlamento de Galicia é o foro de debate axeitado, non os concellos”.
Desde o grupo popular, a súa portavoz insistiu en que “a Xunta respondeu e continúa respondendo”, citando como exemplo as medidas aprobadas no Parlamento e a concesión das primeiras axudas ás persoas afectadas.
