A Valedora do Pobo reiterou á Consellería de Educación, Ciencia, Universidades e FP a súa petición de información respecto aos “recortes de profesorado” no CEIP de Pedrouzos, en Brión, tras a denuncia presentada pola ANPA Andaravía. A institución que dirixe María Dores Fernández Galiño informou que aínda non recibiu resposta da Administración autonómica, o que motivou unha nova solicitude de datos.
A queixa foi presentada pola dirección da ANPA Andaravía o pasado 6 de setembro, na que sinalaban que a Consellería non cumpría coa “normativa de comedores”, o “acordo de cocientes” asinado en outubro de 2023 e o “deber de atender adecuadamente” aos estudantes con necesidades educativas especiais. A Valedora admitiu a trámite esta denuncia o 17 de setembro e concedeu un prazo de 15 días para que a Consellería remitise un informe aclaratorio.
Non obstante, nun novo escrito do 18 de outubro, a Valedora (en funcións) lembrou á Consellería que esta resposta é “unha obrigación legal” e instou novamente á Administración autonómica a enviar o informe sobre os problemas denunciados.
O CEIP de Pedrouzos, situado en Brión, converteuse nun centro de foco mediático despois das denuncias de recortes de profesorado e o suposto incumprimento de ratios e medidas específicas de atención ao alumnado, cuestións que a ANPA cualifica de “preocupantes” para a calidade do ensino no centro educativo.
