Melchor, Gaspar e Baltasar foron os protagonistas do tradicional Festival de Reis organizado polo Concello de Boqueixón, que se celebrou no polideportivo municipal do Forte cunha ampla asistencia de público. Centos de persoas, maioritariamente familias con crianzas, encheron o recinto para participar nunha xornada de lecer vinculada ás celebracións do Nadal.
A programación arrancou cunha nova edición do Boqueixogo, que puxo á disposición da rapazada diversos inchables e propostas lúdicas. Posteriormente tivo lugar a recepción das Súas Maxestades, na que os nenos e nenas puideron achegarse a Melchor, Gaspar e Baltasar para lembrar as súas peticións de agasallos. Ao remate do encontro, repartíronse lambonadas entre as crianzas asistentes.
O acto contou coa presenza do alcalde de Boqueixón, Ovidio Rodeiro, e da concelleira de Servizos Sociais, Ángela Conde, que acompañaron á comitiva real durante o desenvolvemento da xornada. A celebración concluíu cunha chocolatada ofrecida ao conxunto das persoas asistentes.
A programación continuará hoxe martes, 6 de xaneiro, cunha segunda sesión do Boqueixogo, que se desenvolverá no polideportivo municipal do Forte entre as 17:00 e as 21:00. A actividade, dirixida á infancia, contará novamente con inchables variados e será de acceso libre e gratuíto.
