A Xunta de Galicia finalizou as obras da nova estación depuradora de augas residuais (EDAR) de Sergude, no concello de Boqueixón, un proxecto que supuxo un investimento superior a 1,8 millóns de euros. A infraestrutura, que será entregada ao Concello nos próximos días, triplicará a capacidade de tratamento respecto á antiga depuradora de Lestedo, construída en 1991, e permitirá dar servizo a 3.000 habitantes equivalentes no horizonte de 2042.
A conselleira de Medio Ambiente e Cambio Climático, Ángeles Vázquez, e o alcalde de Boqueixón, Ovidio Rodeiro, visitaron esta mañá as instalacións, que foron posible grazas a un convenio de colaboración entre Augas de Galicia e o Concello. Neste acordo, a Xunta asumiu arredor do 80% do investimento, mentres que o Concello achegou máis de 360.000 euros, cedeu os terreos necesarios e encargarase do mantemento das instalacións.
Durante a visita, Ángeles Vázquez destacou que a nova EDAR “permite mellorar a rede de saneamento e unificar o tratamento das augas residuais nos núcleos de Sergude e Lestedo”. Ademais, felicitou ao alcalde por “traballar para que un pequeno municipio como Boqueixón se converta nun concello con grandes servizos e de calidade de vida para os que aquí viven, pero tamén para convidar a outros a vir”.
Por outra parte, Ovidio Rodeiro lembrou que a primeira depuradora do concello, construída en Lestedo no ano 1991, era “unha pequena instalación que será substituída por esta nova infraestrutura”. O alcalde destacou que, desde aquel ano, o Concello puxo en marcha un amplo servizo de saneamento, que actualmente conta con 92 quilómetros de tubaxes, 14 pequenas depuradoras e 13 bombeos, cun investimento de 8.000 euros por cada casa. “Neste momento temos 1.478 enganches ao saneamento, unha porcentaxe altísima de poboación”, engadiu.
A nova EDAR, que inclúe liña de auga e liña de lodos, conta con pretratamento e tratamento biolóxico, cunha capacidade media de 44 metros cúbicos de auga á hora. Ademais, dispón dun tanque de tormentas para xestionar excedentes en caso de choivas intensas. As instalacións están deseñadas para acadar un mínimo vertido e inclúen tratamento secundario para a eliminación do nitróxeno.
Este proxecto, cofinanciado polo Fondo Europeo Agrícola de Desenvolvemento Rural (Feader) no marco do Programa de Desenvolvemento Rural de Galicia 2014-2020, supón un avance significativo no saneamento da zona. A nova depuradora non só unificará o tratamento das augas de Sergude e Lestedo, senón que tamén permitirá optimizar o proceso, xa que a antiga infraestrutura, deseñada para 1.000 habitantes equivalentes, resultaba insuficiente para atender as necesidades actuais.
