As empresas interesadas na execución das obras do novo colexio do Milladoiro, en Ames, poderán presentar as súas ofertas ata o próximo día 8 de outubro. A Xunta licitou por 9.784.127 euros a obra de construción do novo CEIP do Milladoiro, e o obxectivo é que o centro estea operativo no curso 2026/27. As obras teñen un prazo de execución de 18 meses.
Este é o primeiro centro construído integramente en base aos parámetros do Plan de Nova Arquitectura Pedagóxica e un compromiso da Xunta para responder as necesidades de prazas nun dos concellos de maior dinamismo demográfico de Galicia. A actuación, que licita a Consellería de Vivenda e Planificación de Infraestruturas será sufragada con fondos da Consellería de Educación, Ciencia, Universidades e FP, co cofinanciamento dos fondos europeos.
