Ames converteuse este domingo nun dos principais escenarios do atletismo internacional coa celebración do XXXIII Campionato do Mundo IAU de 100 quilómetros, disputado nas rúas de Bertamiráns coa participación de deportistas procedentes de 43 países. A competición deixou varios resultados destacados para a selección española, entre eles o bronce absoluto de Gemma Arenas, un novo récord mundial da categoría W45 e o subcampionato feminino por equipos.
A atleta manchega completou os 100 quilómetros en 7:17:50, un rexistro que lle permitiu cruzar a meta na terceira posición da clasificación absoluta feminina. Por diante finalizaron a estadounidense Courtney Olsen, nova campioa do mundo cun tempo de 7:10:31, e a xaponesa Miho Nakayama, prata con 7:11:57.
O resultado conseguido en Bertamiráns permitiu ademais a Arenas establecer un novo récord mundial W45 dos 100 quilómetros e proclamarse campioa do mundo nesta categoría de idade. A marca supón tamén unha nova plusmarca española absoluta, ao mellorar en 3 minutos e 7 segundos o rexistro de 7:20:57 que ela mesma conseguira no Campionato de España celebrado en Málaga o pasado mes de marzo.
A participación española tivo outro dos seus principais resultados na competición feminina por equipos. Gemma Arenas, María Romero, Carmen María Pérez e Estefanía Unzú conseguiron a medalla de prata e o subcampionato mundial, nunha clasificación colectiva liderada por Croacia e na que Finlandia ocupou a terceira posición.
Os resultados españois estendéronse ás diferentes categorías de idade, nas que a competición de Ames deixou sete títulos mundiais individuais. Ademais do ouro W45 de Gemma Arenas, Estefanía Unzú proclamouse campioa W40 e Carlos Gazapo Bravo conseguiu o título mundial M40.
A relación de campións españois completouse con Manel Deli, primeiro en M50; Mari Carmen Fernández Crespo, gañadora da categoría W55; Juan Antonio Ramos Muñoz, campión M55; e Jon Arzubialde, vencedor entre os participantes M60. Os atletas podían competir simultaneamente pola clasificación absoluta e polos títulos correspondentes ás súas respectivas franxas de idade.
Na carreira absoluta feminina, outra representante española, Estefanía Sanzun Ripoll, entrou entre as dez primeiras ao rematar sexta cun tempo de 7:22:13. A croata Nataša Šustić foi sétima con 7:22:43, seguida das francesas Malory Leroy e Selina Leroy, mentres que Mirjana Šimek Bilić completou as dez primeiras posicións.
No apartado masculino, o mellor resultado español correspondeu a Carlos Gazapo Bravo, que finalizou na décima posición cun rexistro de 6:31:09. O estadounidense Charlie Lawrence proclamouse campión do mundo despois de completar os 100 quilómetros en 6:09:25, seguido do lituano Aleksandr Sorokin, con 6:12:41, e do británico Alex Almagro, terceiro con 6:17:50.
O Mundial desenvolveuse sobre un circuíto urbano en Bertamiráns, con saída e chegada na rúa Alcalde Lorenzo. Os participantes tiveron que completar 20 voltas ao trazado para alcanzar os 100 quilómetros dunha das principais competicións internacionais da especialidade de ultrafondo.
A cita estivo organizada polo Concello de Ames e o Club Ecodeporte, coa colaboración da Xunta de Galicia, a través da Consellería de Deportes e do Xacobeo 2027, e da Deputación da Coruña. A chegada de atletas, equipos técnicos, acompañantes e afeccionados procedentes de máis de corenta países converteu Bertamiráns durante a fin de semana nun punto de encontro internacional desta modalidade deportiva.
O alcalde de Ames, Blas García, destacou a repercusión da competición para o municipio. “Hoxe Ames viviu unha xornada que vai quedar na historia do noso concello. Durante meses traballamos para facer posible este Campionato do Mundo e hoxe puidemos ver Bertamiráns convertido no centro mundial do ultrafondo”, afirmou.
O rexedor referiuse tamén aos resultados da delegación española e á dimensión internacional da cita. “Centos de atletas, técnicos, acompañantes e afeccionados chegaron a Ames desde máis de 40 países. Isto permítenos proxectar a imaxe do noso concello internacionalmente e demostrar que Ames ten capacidade para organizar eventos deportivos da máxima dimensión”, sinalou.
García agradeceu igualmente a participación das persoas e entidades implicadas no desenvolvemento da competición, entre elas o voluntariado, o persoal municipal, os servizos sanitarios e as forzas de seguridade. Pola súa banda, o presidente do Comité Organizador, Francisco Rico, puxo en valor a implicación do Concello e o traballo realizado polos diferentes equipos que participaron na preparación e celebración do Mundial.
A competición celebrada en Ames foi a cuarta edición do Campionato do Mundo de 100 quilómetros disputada en España. Con anterioridade, o país xa acollera esta proba internacional en Santander, Palamós e Los Alcázares.
CLASIFICACIÓN ABSOLUTA FEMININA
- Courtney Olsen (Estados Unidos) — 7:10:31
- Miho Nakayama (Xapón) — 7:11:57
- Gemma Arenas Alcázar (España) — 7:17:50
- Noora Honkala (Finlandia) — 7:21:37
- Nikola Szustic-Stankovic (Croacia) — 7:21:57
- Estefanía Sanzun Ripoll (España) — 7:22:13
- Nataša Šustić (Croacia) — 7:22:43
- Malory Leroy (Francia) — 7:24:07
- Selina Leroy (Francia) — 7:26:29
- Mirjana Šimek Bilić (Croacia) — 7:27:46
CLASIFICACIÓN ABSOLUTA MASCULINA
- Charlie Lawrence (Estados Unidos) — 6:09:25
- Aleksandr Sorokin (Lituania) — 6:12:41
- Alex Almagro (Reino Unido) — 6:17:50
- Baruns Zozynski (Polonia) — 6:23:47
- Jason Pinhteau (Francia) — 6:24:34
- Steven Galibert (Francia) — 6:25:30
- Hugh Samuel Tibbs (Reino Unido) — 6:26:54
- Brogan Austin (Estados Unidos) — 6:27:50
- Ollie Meijer (Suecia) — 6:29:55
- Carlos Gazapo Bravo (España) — 6:31:09
