O partido UCIN cualificou de gravísima a situación derivada das obras de humanización do Milladoiro logo das declaracións públicas do alcalde de Ames, Blas García, nas que recoñeceu a existencia de “numerosas deficiencias” na execución do proxecto e admitiu a falta de supervisión municipal durante o seu desenvolvemento.
Segundo trasladou a formación a través do seu coordinador, José Luis Calo, as palabras do rexedor evidencian unha deixadez de funcións por parte do goberno local nunha actuación que tivo un impacto relevante tanto dende o punto de vista económico como social para a veciñanza do Milladoiro, núcleo urbano do Concello de Ames.
UCIN Galicia fai referencia ás manifestacións do alcalde nas que asegurou non estar satisfeito coa execución das obras e anunciou a elaboración dun informe técnico no que se recollerían deficiencias “visibles a simple vista”. Entre os problemas sinalados figuran marquesiñas mal executadas, beirarrúas deseñadas para esquivar tapas da rede ou unha mediana central que, segundo a formación, presenta unha solución inadecuada.
Dende a organización política consideran que estes elementos non poden ser cualificados como erros menores, senón como consecuencia dunha xestión neglixente e dunha ausencia de control político e técnico durante a execución do proxecto. Nese sentido, UCIN Galicia cuestiona como foi posible que o Concello permitise que estas deficiencias se acumulasen sen adoptar medidas correctoras a tempo.
A formación tamén rexeita que a responsabilidade se traslade ao Ministerio ou á empresa adxudicataria, ao entender que a obriga de vixiar, supervisar e garantir o cumprimento do contrato corresponde exclusivamente ao goberno municipal. “Non vale agora trasladar a responsabilidade a terceiros”, sostén UCIN Galicia no seu comunicado.
Por todo isto, UCIN Galicia esixe a dimisión inmediata do alcalde de Ames e do concelleiro de Obras, ao considerar que existe unha incapacidade manifesta para exercer as súas funcións e que se puxeron en risco tanto os cartos públicos como a calidade das infraestruturas do Milladoiro.
A formación conclúe que a veciñanza de Ames merece un goberno rigoroso, transparente e esixente coa execución das obras públicas, e considera que as explicacións ofrecidas polo executivo local chegan tarde e resultan insuficientes ante a magnitude dos problemas recoñecidos.
