O Concello de Ames, a través da Concellería de Promoción Económica, puxo en marcha o pasado 19 de decembro unha nova edición das tarxetas desconto ‘Bonos Consuma’, unha iniciativa orientada a incentivar o consumo no comercio e na hostalaría local durante a campaña de Nadal. O programa esgotou o orzamento de 60.000 euros destinado aos descontos en menos de dúas semanas, o que permitiu xerar un volume de negocio total de 249.750,62 euros nos establecementos adheridos.
Durante o período no que estiveron dispoñibles os bonos, descargáronse un total de 3.282 tarxetas, que puideron empregarse en 108 comercios e negocios hostaleiros do municipio, pertencentes a sectores moi diversos como moda e complementos, moda infantil, zapaterías, decoración, estética ou servizos persoais, entre outros.
A concelleira de Promoción Económica, Ana Belén Paz, valorou de maneira positiva os resultados desta edición e destacou que os Bonos Consuma “están plenamente consolidados como un clásico do Nadal en Ames que a veciñanza apoia e espera ano tras ano”. Nesa liña, sinalou que desde o Concello se continuará a traballar en novas vías de colaboración co comercio local, mantendo esta iniciativa como unha ferramenta de apoio ao consumo de proximidade e á dinamización da economía local.
REPARTICIÓN DO GASTO XERADO
Segundo os datos achegados polo Concello, a maior parte do impacto económico da campaña concentrouse no comercio polo miúdo, que acadou un volume de negocio de 228.544,96 euros. Pola súa banda, os servizos persoais rexistraron un gasto de 14.830,57 euros, mentres que a hostalaría sumou 4.168,19 euros en consumo asociado aos bonos.
UN PROGRAMA EN CRECEMENTO DENDE 2021
Desde a súa primeira edición no ano 2021, os Bonos Consuma experimentaron un crecemento continuado tanto en participación como en impacto económico. A iniciativa naceu co obxectivo de reforzar o tecido comercial amesán e facilitar á veciñanza un aforro nas compras de Nadal.
Nesta edición, cada persoa maior de 18 anos puido descargar un único bono por valor de 50 euros, utilizable ata o seu esgotamento ou ata que se consumise o crédito total do programa. Os 60.000 euros consignados polo Concello destináronse integramente á adquisición destes descontos, cun sistema de descarga e uso a través dunha aplicación móbil, que contribuíu a facilitar o acceso e o uso por parte da cidadanía.
