A formación UCIN Ames fixo pública unha denuncia sobre o estado dos terreos anexos ao centro de saúde do Milladoiro, que, segundo sinala, presentan unha situación de abandono prolongado. A organización asegura que a acumulación de maleza sen control, sucidade e presenza de ratas converteu esta área nun posible foco de insalubridade, nun espazo próximo a un servizo sanitario de uso diario.
Segundo trasladou UCIN Ames, trátase dun entorno especialmente concorrido, frecuentado por persoas maiores, pacientes, nenos e profesionais sanitarios, o que incrementa a preocupación polo impacto que estas condicións poden ter na saúde pública. A formación indica que o problema é coñecido desde hai tempo e considera que non se adoptaron medidas eficaces por parte do goberno municipal para corrixilo.
Desde UCIN Ames sinalan que resulta inadmisible que un equipamento sanitario público estea rodeado por parcelas sen mantemento, unha situación que, ao seu xuízo, transmite unha imaxe de deixamento institucional impropia dun concello como Ames. A organización incide en que a limpeza e conservación destas zonas debería formar parte das obrigas básicas da administración local.
O coordinador de UCIN Galicia, José Luis Calo, referiuse a esta situación como un problema que vai máis alá do aspecto visual. “Estamos ante un claro exemplo de abandono por parte do goberno de Ames. Non é un problema menor nin estético, é unha cuestión de saúde pública. A maleza, as ratas e a sucidade están a poucos metros dun centro de saúde e ninguén fai nada. Esta pasividade é inaceptable”, afirmou.
Ante este escenario, UCIN Ames esixe actuacións inmediatas, entre elas unha limpeza integral dos terreos, desbroces periódicos, medidas de control de pragas e a elaboración dun plan de mantemento continuado que evite que a situación se repita no futuro. A formación advirte de que continuará facendo públicas este tipo de denuncias mentres non se adopten solucións efectivas.
