O Concello de Ames, a través da Concellaría de Benestar Social, organiza este sábado 13 de decembro ás 17.00 unha nova edición da FestAmes Diversa, unha celebración que busca reforzar a visibilidade e o recoñecemento das persoas con diversidade funcional no marco do Día Internacional das Persoas con Diversidade Funcional, conmemorado cada 3 de decembro. O encontro terá lugar na Casa da Cultura do Milladoiro e contará con actuacións, convidados e espazos de convivencia.
A concelleira de Benestar Social, Uxía García, salientou que “volve un ano máis a FestAmes Diversa”, lembrando que o evento pretende abrir “a fiestra á diversidade, á diversión, á celebración e á comunidade”. Destacou tamén que a gala aspira a converterse nun espazo de encontro onde se poña en valor “a convivencia das persoas con diversidade en total normalidade”.
A actriz e presentadora Carlota Mosquera será a encargada de dar a benvida e conducir unha programación que comezará ás 17.00 e que incluirá diversas propostas culturais. Entre elas estará Freestyle People, colectivo de rap improvisado formado por mozas e mozos en risco de exclusión social e por artistas con diversidade funcional. O grupo, nacido da colaboración entre Gallos del Norte e Poten100mos, achegará varias intervencións musicais ao longo da tarde.
A xornada tamén incorporará unha mostra do proxecto ‘A Nosa Champions’, impulsado pola Federación Galega de Fútbol. O coordinador da sección de fútbol da Sociedade Recreativa San Xoán de Calo, Manuel Buján, presentará esta iniciativa que promove a integración a través do deporte e na que participan xogadores e xogadoras de Ames, Calo e Compostela con discapacidade intelectual. Durante o acto proxectarase un vídeo da competición e intervirán algúns dos seus integrantes.
O baile terá igualmente un papel destacado coa participación da asociación Arcea-Adames, entidade do Milladoiro que desde 2006 desenvolve obradoiros ocupacionais para persoas con diversidade funcional. Oito das súas usuarias e usuarios subirán ao escenario, acompañados dunha educadora e da profesora de movemento, para reinterpretar o popular tema La bomba, de King África.
A tarde completarase cun espazo dedicado ao photocall e ao fotomatón, que permitirán ao público facerse fotografías como recordo da festa. O acto rematará arredor das 18.45, cunha pequena recepción na entrada da Casa da Cultura, onde se ofrecerán petiscos para as persoas asistentes.
O alcalde de Ames, Blas García, e a concelleira Uxía García pecharán a gala agradecendo a participación dos colectivos implicados e subliñando a importancia de manter espazos que visibilicen o traballo e a realidade das persoas con diversidade funcional no municipio.
