O Concello de Ames abriu esta mañá, ás 10:00, o prazo para facerse coas entradas da Festa de Fin de Ano, que este ano se celebrará no pavillón de Bertamiráns. Nunhas horas, ata ás 14:00, contabilizáronse xa 320 billetes vendidos, dispoñibles unicamente en formato dixital mediante a ligazón oficial. As persoas interesadas poden adquirilos ata o 28 de decembro, cun prezo anticipado de 25 euros máis 0,65 euros de gastos de xestión. A entrada dá acceso ao evento, previsto entre 1:00 e 8:00, e inclúe dúas consumicións, servizo de roupeiro e acceso ao autobús especial municipal.
Para facilitar a mobilidade da veciñanza durante a madrugada do 1 de xaneiro, a organización activará unha liña fixa de autobús, con saída á 1:00 e paradas en O Milladoiro (centro de saúde), Bugallido (farmacia), Ortoño / Agro do Muíño (As Cortes), Bertamiráns (Casa do Concello) e As Mimosas.
A volta desde o pavillón de Bertamiráns comezará ás 4:00, con frecuencias horarias ata as 8:00. O Concello estuda ademais unha segunda liña baixo demanda para atender outras necesidades, e anima a enviar propostas ao correo gabinete@ames.gal.
A Xuntanza de Empresarios de Ames impulsa este ano unha campaña específica para promover o consumo de chocolate con churros en Bertamiráns na mañá do 1 de xaneiro, convidando tanto ás persoas asistentes á festa como ao público en xeral a participar nesta tradición nos bares e cafeterías da zona.
O Concello presenta o lema ‘Este 31 de decembro queda no teu concello… Fin de Ano en Ames!’ para unha proposta que busca concentrar no municipio as celebracións do remate de 2025. Xunto á Festa de Fin de Ano —dirixida a maiores de 18 anos—, haberá Prebadaladas e o novo Tardeo, pensado para todos os públicos.
O Tardeo celebrarase na Praza do Concello, entre as 17:00 e as 21:00, e contará coa música de DJ Wana do Milladoiro e cunha barra atendida polos locais StreetGarden, Asador Vacavella e O Transistor. A proposta pretende crear ambiente festivo desde a tarde, incentivando os encontros veciñais nun espazo céntrico e accesible.
