O BNG de Ames presentou unha serie de emendas aos orzamentos da Xunta para 2026 centradas en mellorar os servizos sanitarios, a conservación do patrimonio e a seguridade viaria no municipio. A portavoz nacionalista, Escarlata Pampín, destacou que a defensa da sanidade pública é unha das prioridades da formación e insistiu na necesidade de ampliar o Centro de Saúde e o PAC de Bertamiráns.
Segundo Pampín, o edificio actual “está obsoleto e non é funcional, ademais de estar sobrecargado en tódalas consultas”, polo que o BNG pide construír unha nova estrutura “ben dimensionada e acondicionada” no terreo xa cedido polo Concello. A concelleira subliñou que o centro non está preparado para atender nin á poboación actual nin á futura.
O grupo municipal nacionalista tamén inclúe entre as súas propostas a creación dun centro de día público terapéutico para persoas maiores, iniciativa que o BNG xa presentara en exercicios anteriores e que considera unha necesidade urxente ante o envellecemento da poboación amesá.
No ámbito patrimonial, Pampín advertiu do deterioro do conxunto histórico de Ponte Maceira, un dos principais atractivos turísticos e camiños de paso de peregrinos. O BNG reclama á Xunta executar o proxecto de reconstrución da presa, anunciado en 2023, e elaborar un plan integral de conservación que inclúa os antigos muíños, un deles xa parcialmente derruído.
As emendas nacionalistas tamén fan referencia á seguridade viaria, un asunto “reiteradamente denunciado” desde o Concello. O BNG demanda melloras na estrada AC-544, en especial no tramo de Reino, onde, segundo Pampín, “levamos dúas décadas reclamando solucións” ante a falta de sinalización e de pasos seguros para peóns. A formación inclúe ademais actuacións de ampliación e humanización na AC-453 (Roxos–Portomouro) e no corredor Pardiñas-As Galanas da AG-56, que considera imprescindibles para completar a “humanización do Milladoiro”.
Finalmente, o BNG volve reclamar a ampliación da planta de depuración de Sisalde, construída para unha poboación de 10.400 habitantes e xa insuficiente tras o crecemento demográfico dos últimos anos. Pampín defendeu que esta obra é “fundamental para garantir unha xestión axeitada das augas residuais e o equilibrio ambiental do concello”.
