O Concello de Ames deu inicio esta semana ás obras de demolición do inmoble número 6 da rúa Madalena, un paso previo á humanización do entorno das rúas Madalena, Estivada de Castelao e Camelias, no Milladoiro. O alcalde Blas García e o concelleiro de Obras desprazáronse ata o lugar para supervisar o comezo dos traballos, centrados agora nas tarefas de desescombro e saneamento.
O rexedor explicou que esta intervención “vai facer posible ver o avance do Milladoiro que se quere impulsar dende o Concello de Ames”, e lembrou que forma parte dun proxecto integral de mellora urbana e mobilidade sostible. “Seguimos avanzando no Milladoiro do futuro, seguimos mellorando o núcleo máis grande e importante do noso concello”, sinalou.
A demolición do inmoble foi precedida pola súa expropiación no marco do plan ‘Ames Progresas 2021-2023’, e dá paso agora ao desenvolvemento da seguinte fase incluída no plan ‘Conecta Ames’, que conta cun orzamento total de 10.912.878 euros.
Deste investimento, o 60% (6,5 millóns de euros) será achegado a través de fondos europeos FEDER da Estratexia de Desenvolvemento Integrado Local (EDIL), mentres que o 40% restante (4,3 millóns) se cubrirá con financiamento propio, autonómico ou provincial.
O proxecto busca priorizar o uso peonil e ciclista fronte ao vehículo rodado, mellorar a mobilidade e a calidade urbana e conectar O Milladoiro coas parroquias rurais e con Bertamiráns mediante unha senda ciclable e peonil. Esta vía artellará diferentes espazos públicos periurbanos, entre eles as rúas Ameixeiras e Juan Bueno Bueno, así como zonas de Bugallido, Ortoño, Guimaráns e Buceleiras, ata enlazar coa rúa Alcalde Lorenzo.
