O grupo municipal Espazo Común (ESCO) expresou o seu rexeitamento á nova ordenanza da taxa do lixo aprobada no último pleno do Concello de Ames, que contou cos votos favorables do PSOE e o PP. A formación cualificou a medida de “inxusta, antisocial e allea aos principios de proporcionalidade e capacidade económica”, lamentando que o goberno local desbotase as súas propostas para facer unha ordenanza “máis social e ambientalmente responsable”.
Segundo explicou ESCO, a nova normativa “castiga novamente ao rural, ás familias con menos recursos e ás familias numerosas”, ao tempo que non incorpora incentivos para fomentar a reciclaxe nin establece criterios de progresividade. “O PSOE perdeu unha oportunidade para facer unha ordenanza máis xusta e ambientalmente responsable. O que precisamos é un modelo que premie as boas prácticas e reparta os custos con equidade”, indicaron desde o grupo.
Espazo Común asegura ter presentado propostas alternativas que non foron tidas en conta polo executivo municipal, entre elas a celebración de reunións coa veciñanza e co tecido comercial, a definición dun modelo de xestión claro, e subas graduais que permitan ás familias adaptarse ao novo custo sen un impacto inmediato nas economías domésticas.
Outras das medidas defendidas pola formación incluían vincular a taxa ao consumo de auga, como referencia para estimar o volume de residuos e fomentar un uso responsable, así como establecer cotas progresivas en función da capacidade económica de cada fogar. ESCO tamén propuxo bonificacións do 55% para quen recicle e unha tarifa cero para persoas beneficiarias da RISGA ou doutros subsidios sociais, con cotas axustadas aos tramos do IPREM.
A formación lamenta que o goberno local non abrira un proceso participativo nin dialogara co tecido veciñal antes de aprobar a medida, que consideran “un novo exemplo de falta de sensibilidade social e ambiental na xestión municipal”.
VALORACIÓN DE UCIN
Pola súa banda, o coordinador de UCIN Galicia, José Luis Calo, expresou tamén o seu total rexeitamento á suba da taxa do lixo, que cualificou como “un auténtico tasazo que castiga aos veciños, ás familias numerosas e aos pequenos negocios do concello”. Calo advertiu de que o incremento do custo de Sogama non pode recaer sobre a cidadanía, e acusou ao goberno local de “mirar para outro lado ante os problemas reais da xente, sen buscar alternativas reais nin unha xestión máis eficiente dos recursos municipais”.
O dirixente de UCIN asegurou que esta medida terá un impacto directo no peto das familias e na viabilidade dos comercios e autónomos, e reclamou que o executivo amiense “retire a proposta e abra un proceso de diálogo coa cidadanía, co tecido asociativo e co sector empresarial”. O partido, engadiu, apoiará todas as iniciativas veciñais e sociais que se opoñan a esta suba, en defensa dunha xestión municipal “responsable, transparente e próxima á xente”.
