O Bloque Nacionalista Galego pediu ao Goberno do Estado que amose “total disposición” para transferir ao Concello de Ames a titularidade do tramo ferroviario abandonado entre Fraiz e A Moniña, co fin de recuperar o espazo e transformalo nunha senda verde peonil.
O deputado do BNG no Congreso, Néstor Rego, visitou o municipio acompañado da voceira municipal Escarlata Pampín e do resto de concelleiros nacionalistas. Durante o encontro, Rego subliñou que “o que no seu momento foi unha infraestrutura de transporte estratéxica converteuse nun antigo camiño de ferro en progresivo deterioro que está completamente abandonado”.
Co obxectivo de frear o abandono e poñer en valor o trazado ferroviario, o BNG rexistrou iniciativas parlamentarias nas que solicita que o Estado facilite o traspaso ao Concello e apoie a creación desta senda verde. “Trátase de pasar do deterioro á conservación e de darlle un uso útil e beneficioso para a veciñanza”, explicou o deputado.
Segundo Rego, a posta en marcha deste proxecto impulsaría un modelo de desenvolvemento respectuoso co medio, en consonancia coa Axenda 2030, e promovería a rehabilitación do patrimonio en desuso. Ademais, a creación de itinerarios para o tránsito peonil contribuiría “á mellora da calidade de vida, á promoción de hábitos saudábeis e ao fomento de alternativas de mobilidade non contaminantes”.
A voceira municipal do BNG en Ames, Escarlata Pampín, lembrou que esta actuación formaba parte do acordo político entre o BNG e o PSOE para a aprobación dos Orzamentos municipais, que saíron adiante coa abstención do grupo nacionalista. “Conseguir o traspaso figuraba no acordo político entre o BNG e o PSOE, pero a día de hoxe nada se sabe sobre as xestións que o goberno municipal realizou sobre o tema”, denunciou Pampín.
O BNG insta agora tanto ao Ministerio de Transportes como ao Concello de Ames a comprometerse coa iniciativa e iniciar as xestións necesarias para facer realidade unha senda verde que conecte Fraiz e A Moniña e transforme un espazo hoxe degradado nun recurso público para o lecer e a mobilidade sustentábel.
