O Concello de Ames, a través da súa Concellaría de Mobilidade, vén de trasladar á Dirección Xeral de Mobilidade da Xunta de Galicia unha nova remesa de queixas veciñais sobre a situación do transporte metropolitano, especialmente nas liñas que conectan Bertamiráns e A Gándara coa cidade de Santiago.
Segundo informa o goberno local, as reclamacións fan referencia a problemas recorrentes de masificación, falta de frecuencias e inseguridade, que afectan a centos de persoas usuarias, especialmente en horarios de mañá entre as 7:50 e as 9:50, coincidindo coas entradas a centros de ensino e lugares de traballo.
Un dos testemuños enviados ao Concello describe a situación diaria no autobús interurbano A Gándara–Rúa da Rosa, cun ton crítico: “Xente empurrándose nas marquesiñas, corredores cheos de persoas enriba unhas das outras, estudantes e traballadores abandonados nas paradas porque xa non colle ninguén máis no bus”. A carta, remitida por unha usuaria habitual, exemplifica a realidade dun servizo que, segundo as denuncias, leva anos sen melloras estruturais malia o crecemento poboacional.
Un dos episodios máis sinalados foi o sucedido o pasado 13 de marzo, cando un control da Garda Civil, acompañado por unha reporteira, accedeu a un dos autobuses para lembrar a obrigatoriedade do cinto de seguridade. Esta acción provocou reaccións entre os usuarios, que denuncian que ‘moitas veces non hai nin onde sentarse, menos aínda onde poñer un cinto’. A propia reclamante pregunta: ‘A onde se pretende que enganche o meu cinto se adoito ir de pé encaixada entre a xente?’
Esta situación, indican desde o Concello, “reflicte a contradición entre as esixencias normativas e a realidade dos servizos ofrecidos”. A reclamación foi enviada á Consellería de Presidencia, Xustiza e Deportes, responsable autonómica do servizo.
AMES RECLAMA UN SERVIZO DIGNO PARA UN CONCELLO EN CRECEMENTO
O alcalde de Ames, Blas García, e a concelleira de Mobilidade, Susana Señorís, lembran que o municipio é ‘o único de Galicia que segue a medrar de forma continua, cunha demanda crecente de servizos públicos axeitados’. Neste sentido, insisten en que ‘non se pode ofrecer un transporte público masificado e insuficiente a unha veciñanza que medra ano tras ano’.
Desde o goberno local faise un chamamento á cidadanía para que continúe enviando queixas e incidencias sobre o funcionamento do bus metropolitano e do Servizo de Interese Municipal (SIMU), tanto a través do correo mobilidade@concellodeames.gal como mediante o rexistro municipal.
O Concello lembra que todas as queixas se remiten á Xunta de Galicia, administración competente en materia de mobilidade, e critica que moitas das incidencias denunciadas desde hai tempo non recibiron solución ata o momento.
As demandas máis reiteradas inclúen máis frecuencias en horas punta, aumento da capacidade dos vehículos, melloras na seguridade a bordo e a adaptación do servizo á realidade dun municipio con dous núcleos urbanos diferenciados e unha intensa mobilidade pendular cara a Santiago.
