O Concello de Ames deu un novo paso no seu compromiso coas infraestruturas rurais ao aprobar a licitación das obras de pavimentación de viarios no núcleo de Biduído de Arriba, cun orzamento base de 185.104,42 euros. A actuación está incluída no POS+ Adicional 2/2024 e forma parte dun plan máis amplo que busca mellorar a funcionalidade e seguridade viaria nos interiores dos núcleos rurais.
Segundo o concelleiro de Obras e Servizos Básicos, Gustavo Nieto, este proxecto reflicte o obxectivo do goberno local de acondicionar as vías en zonas rurais: ‘A través do POS+ Adicional 2/2024, temos a posibilidade de executar catro novas obras, garantindo que as estradas estean en óptimas condicións para a cidadanía’.
Ademais de Biduído de Arriba, as obras do POS+ inclúen a pavimentación de viarios no Castro de Ortoño, a senda entre A Ponte Maceira e Carballo, e melloras na seguridade viaria en Covas. Estas actuacións, xunto coas melloras no edificio da Escola Municipal de Música e Protección Civil en Aldea Nova, supoñen un investimento total de 986.033,68 euros.
DETALLES DO PROXECTO
O proxecto para Biduído de Arriba inclúe a reparación do firme existente con formigón e aglomerado, así como a instalación dunha nova rede de drenaxe e iluminación. Os traballos abranguen:
- Viarios principais: aplicación de formigón HM-20 con mallazo, demolición do firme antigo e instalación de franxas de granito.
- Viarios secundarios: nivelación con zahorra e aplicación de aglomerado en quente tras reparar focancas e perfilar mordentes.
- Drenaxe: canalización de 320 metros de tubo de polipropileno para a recollida de augas pluviais, complementado con arquetas, pozos e canles de fundición dúctil.
- Iluminación: colocación de canalizacións de polipropileno de 90 mm para futuros puntos de luz pública.
