Os Concellos de Ames e Brión celebraron este xoves a clausura do obradoiro de emprego dual Renova VI, no que participaron 20 persoas formadas en montaxe e mantemento de instalacións solares fotovoltaicas. O acto tivo lugar en presenza dos alcaldes de ambos municipios, Blas García Piñeiro (Ames) e Pablo Lago Sanmartín (Brión), da delegada territorial da Xunta, Belén do Campo Piñeiro, e das concelleiras de Promoción Económica e Emprego, Guarina Rey Vázquez e Ana Belén Paz García.
Durante os 12 meses do obradoiro, realizáronse 22 actuacións entre Ames e Brión. En Brión acometeuse a rehabilitación integral da piscina de Bastavales, incluíndo a mellora dos sistemas de tubaxes, filtros e bombas, así como reformas nos vestiarios. Ademais, instaláronse paneis fotovoltaicos en edificios municipais como o pavillón polideportivo e a biblioteca.
En Ames, destacou a instalación de 90 módulos solares fotovoltaicos na depuradora de Sisalde, que presta servizo a ambos municipios, así como actuacións similares nas piscinas municipais de Bertamiráns e Milladoiro. Realizáronse tamén traballos de mantemento noutras instalacións como o centro de formación e emprego, a Casa da Cultura e varios campos de fútbol e pavillóns.
FORMACIÓN E INSERCIÓN LABORAL
Os participantes completaron un total de 1.920 horas de formación teórica e práctica, recibindo o certificado de profesionalidade ENAE0108 e outras acreditacións en prevención de riscos laborais, traballos en altura e mantemento de piscinas. Estas cualificacións buscan mellorar a súa empregabilidade nun sector con alta demanda.
A delegada da Xunta, Belén do Campo, salientou a importancia destes obradoiros: “Permiten dotar á poboación activa de formación de calidade e desenvolver un traballo produtivo de interese social”. Ademais, animou aos participantes a “buscar emprego ou mesmo emprender no sector das enerxías renovables, que precisa de profesionais cualificados”.
Ames e Brión continuarán con esta liña de formación coa posta en marcha do Renova VII, que contará cun financiamento de máis de 411.000 euros e permitirá formar outras 20 persoas sen emprego. A Xunta investirá case un millón de euros entre ambos obradoiros, segundo informou Do Campo, subliñando que “este tipo de accións reforzan o emprego no rural, adaptando a oferta formativa ás necesidades reais dos municipios”.
A nivel autonómico, os obradoiros de emprego duais contan cun investimento global de máis de 36 millóns de euros, beneficiando a máis de 1.700 persoas en Galicia.
