Os Socialistas de Ames celebraron este venres unha homenaxe a Manolo Paz, histórico militante da agrupación local, nunha cea que reuniu a máis de 60 asistentes no Milladoiro. O evento contou coa presenza do secretario xeral provincial, Bernardo Fernández, e do deputado autonómico, Julio Abalde, así como representantes do socialismo comarcal.
Durante o acto, o secretario xeral dos socialistas amesáns e alcalde de Ames, Blas García, entregou a Paz unha peza de Sargadelos en recoñecemento á súa longa traxectoria e dedicación ao partido. “Non podemos esquecer que os que hoxe estamos aquí gobernando é grazas á labor de persoas coma Manolo”, subliñou García, quen tamén destacou que a unidade e o traballo son os valores que permitirán ao partido recuperar a Xunta de Galicia.
Paz dedicou o recoñecemento ás persoas que contribuíron ao crecemento da agrupación, recordando que “nunha época na que facer política non era tan sinxelo” o partido en Ames logrou importantes avances sen contar con maiorías absolutas. “Seguiremos traballando porque algún día sexa posible”, afirmou o homenaxeado.
Pola súa banda, Bernardo Fernández criticou o ambiente de crispación actual e atribuíu a responsabilidade á falta de argumentos da oposición. Fernández destacou a capacidade do goberno socialista de Ames para xestionar nunha corporación fragmentada, recoñecendo que esta habilidade para chegar a acordos ten sido clave na consolidación do partido a nivel municipal en Galicia.
No evento participaron tamén Ángel Leis, alcalde de Negreira, Pablo Lago, alcalde de Brión, Aitor Bouza, secretario xeral de Santiago de Compostela, e Mayte Argibay, portavoz socialista de Teo, así como militantes de agrupacións comarcais, que manifestaron o seu apoio a Paz e aos Socialistas de Ames nesta celebración.
