O BNG de Ames presentou unha moción no pleno do próximo 31 de outubro para demandar unha revisión do transporte público no rural do concello. A formación propón unha serie de medidas para mellorar a mobilidade da veciñanza e esixir á Xunta de Galicia o cumprimento dos contratos en vigor do servizo de transporte.
Entre as propostas, o BNG solicita que o Concello de Ames dote de marquesiñas ás paradas do rural e que a Xunta garanta o correcto cumprimento dos percorridos e horarios. Ademais, propoñen a incorporación dun Servizo de Noitebús para mellorar o acceso ao transporte durante a noite.
Escarlata Pampín, voceira do BNG, subliña que o actual deseño do transporte público “provoca unha clara discriminación” para a veciñanza do rural, dificultando especialmente o acceso á ensinanza superior e afectando a persoas sen transporte privado, como a mocidade e os maiores.
