A oferta de voos internacionais do aeroporto Rosalía de Castro de Santiago quedará reducida ao mínimo a partir do vindeiro mes de outubro. Trátase dun recorte de liñas e frecuencias que xa afectara ao principal aeroporto galego o ano pasado. O pasado inverno, as compañías aéreas fixeron desaparecer 9 das 15 que conectaban compostela con aeroportos europeos.
A partir deste mes de outubro os únicos voos internacionais que operará o aeroporto de Lavacolla serán a Londres, París, Xinebra e Basilea.
Estas son as rutas principales que desaparecerán ou que verán reducidas as súas frecuencias:
| Destino | Compañía aérea | Estado da ruta |
|---|---|---|
| Londres | Vueling | Mantén os servizos |
| Londres | Ryanair | Elimina o voo dos sábados, manténdoo de luns a venres |
| París | Vueling | Reduce de 5 a 3 os voos semanais (luns, venres e domingo) |
| Basilea | EasyJet | Reduce de 4 a 2 os voos semanais (martes e sábados) |
| Xinegra | EasyJet | Reduce o servizo diario a 3 semanais (mércores, venres e domingo) |
| Memmingen | Ryanair | Elimínase a ruta a partir do 24 de outubro |
| Milán-Bérgamo | Ryanair | Elimínase a ruta a partir do 25 de outubro |
| Dublín | Ryanair | Elimínase a ruta a partir do 25 de outubro |
| Boloña | Ryanair | Elimínase a ruta a partir do 30 de outubro |
| Bruxelas | Ryanair | Elimínase a ruta a partir do 1 de novembro |
| Ámsterdam | Vueling | Elimínase a ruta a partir do 26 de outubro |
| Fráncfort | Lufthansa | Elimínase a ruta a partir do 26 de outubro |
| Dublín | Swiss | Elimínase a ruta a partir do 25 de outubro |
O CONCELLO RECLAMA Á XUNTA MÁIS IMPLICACIÓN
O Concello de Santiago, pola súa parte, volve poñer sobre a mesa a falta de coordinación entre os tres aeroportos galegos tras este recorte de rutas exteriores en Lavacolla. Esta situación levou á alcaldesa, Goretti Sanmartín, e á concelleira de Turismo, Míriam Louzao, a interpelar tanto á Xunta de Galicia como a Aena para que tomen medidas ante esta perda de conexións internacionais.
Louzao recoñeceu que as decisións das aeroliñas, como empresas privadas, “responden ás súas políticas”, pero subliñou que é o Goberno galego quen debe liderar a política aeroportuaria en Galicia. “Noutras comunidades, os gobernos autonómicos están a investir no ámbito aeroportuario. Aquí pedimos que a Xunta tome partido”, afirmou.
Na mesma liña, recordou que en abril deste ano, durante unha reunión do comité de coordinación aeroportuaria, a alcaldesa tamén pediu apoio a Aena para avanzar cara á coordinación dos tres aeroportos galegos. “Entendemos que a política aeroportuaria ten que ser de país, pero nin desde Aena nin desde a Xunta obtivemos resposta”, lamentou Louzao.
Aínda que Lavacolla rexistrou un incremento do 7 % no tráfico comercial entre xaneiro e xullo, o recorte de rutas internacionais segue sendo unha preocupación para o Concello, xa que un total de 8 cidades europeas perderán conexión coa capital galega: Bolonia, Bruxelas, Dublín, Memmingen e Milán-Bérgamo, Ámsterdam e Fráncfort, o que se suma á cancelación previa de Zúrich. Así, as únicas rutas exteriores que quedarán dispoñibles serán con Londres, París, Xenebra e Basilea.
Por outra banda, a Xunta de Galicia compartiu a necesidade de coordinar as rutas dos tres aeroportos galegos, pero criticou a falta de avances concretos por parte dos concellos de Santiago, Vigo e A Coruña. Desde o Goberno de Rueda, insisten en que os concellos deben apostar pola coordinación sen visións localistas para facer competitivo o sistema aeroportuario galego.
Finalmente, Aena recordou que presentou os seus incentivos para aumentar o tráfico aéreo e destacou que participa activamente en foros turísticos, aínda que matizou que non interfire nos plans de promoción turística que as administracións pactan coas compañías aéreas.
