A portavoz do Goberno local de Santiago, Míriam Louzao, presentou este martes o itinerarios Patrimonio C. Un total de seis percorridos gratuítos para profundar na historia e patrimonio da capital galega.
Tal e como explicou Louzao en rolda de prensa, esta nova edición convida a descubrir a cidade desde as relacións humanas que deixaron pisadas nela. “Queremos achegar novas maneiras de pasear, de mirar e de coñecer Compostela”, subliñou.
“Non falamos só de parellas da forma máis convencional que podamos entender cada quen, senón de relacións que foron deixando unha pegada no tecido, no relato da nosa cidade: Alianzas, enfrontamentos, amizades, irmandades, afectos”, indicou.
Concretamente, os paseos serán conducidos por Emma Gutiérrez Castro e desenvolveranse os días 22 de abril; 6 e 20 de maio; e 3, 10 e 17 de xuño, sempre ás 19.30 horas. Así, os percorridos terán hora e media de duración.
Neste sentido, a participación é gratuíta, aínda que as persoas interesadas deberán realizar unha inscrición previa a través da web Compostela Cultura a partir deste venres, 17 de abril ás 12.00 horas.
Segundo detallou Louzao, os itinerarios recuperarán historias silenciadas, a través das figuras como as irmás Maruxa e Coralia Fandiño; a relación entre Camiño Díaz Baliño e Ánxel Casal; o vínculo entre Rosalía de Castro e Federico García Lorca ou o de Valle-Inclán e Manuel Otero Acevedo.
Tamén, incluirán relacións marcadas polo poder, como a de Xelmírez e réinaa Urraca, e a das irmás Elisa e Jimena Fernández de la Vega, pioneiras que abriron camiño para as mulleres na ciencia.
