A catedrática en Estatística Rosa Crujeiras tomou posesión como reitora da Universidade de Santiago de Compostela (USC) e asumiu o cargo como unha “responsabilidade histórica” ao ser a primeira muller que o ocupa en máis de 500 anos de historia. Este fito esténdese a toda Galicia, onde ningunha outra muller ata agora estivera ao mando de ningunha das tres universidades.
O agora exrector, Antonio López, cedeu o bastón de mando nun acto institucional presidido polo presidente da Xunta, Alfonso Rueda. No seu discurso, Crujeiras chamou a impulsar “unha transformación profunda, serena e consciente” da institución, na que esta non sexa “allea” ás “vidas da súa comunidade” e ao “tempo” no que está, nin aos “conflitos, desigualdades e fracturas” do mundo.
Desta forma, a nova reitora reivindicou o “espazo, tempo e voz” da universidade e tamén das mulleres, coas que as asumiu o “compromiso” de traballar para que non se atopen teitos de cristal e que o traballo universitario non implique “renuncias”.
“Para min, esta é, tamén, unha responsabilidade histórica. Son herdeira, como todas, doutras que abriron camiño antes que nós, en condicións sempre máis adversas sostendo o ensino, a investigación e a vida universitaria desde posicións subordinadas”, expresou.
Crujeiras situou como un “principio irrenunciable” a defensa do feminismo, os dereitos humanos, a dignidade das persoas e os valores democráticos. Tamén pediu á comunidade universitaria unha “voz de valores”, que se traduza en “accións fronte a problemas sociais”, como a “emerxencia social” da vivenda, a saúde mental e a violencia machista.
