A alcaldesa de Santiago de Compostela, Goretti Sanmartín, manifestou a súa crítica á actuación da Xunta de Galicia ao considerar que existe unha “falta de apoio” á capital galega, especialmente no referido á ausencia de diálogo institucional. As declaracións producíronse tras o debate sobre o estado da autonomía celebrado no Parlamento galego.
A rexedora sinalou que desde o Goberno autonómico “parece que non hai tempo nin para falar nin para sentar” a abordar os asuntos que afectan directamente á cidade. Neste contexto, vinculou o contido do debate autonómico coa realidade de Compostela, asegurando que “en cantidade de cuestións non viu ese apoio”.
Sanmartín insistiu na necesidade de que se recoñeza o papel de Santiago como capital de Galicia e reclamou o cumprimento efectivo do seu marco legal. “Temos que reclamar que se teña en conta que Santiago é a capital e que hai un estatuto de capitalidade que haberá que cumprir. Cremos que niso non se está á altura”, afirmou.
A alcaldesa tamén puxo o foco noutras áreas nas que considera necesaria unha maior implicación da Xunta, como a política de vivenda, apostando por modelos de rehabilitación coordinados entre administracións. Do mesmo xeito, reclamou unha maior iniciativa autonómica en materia de conectividade aeroportuaria, sinalando a necesidade de liderado neste ámbito.
Finalmente, Sanmartín expresou a súa expectativa dun cambio na relación institucional, facendo fincapé na importancia do diálogo. “Eu esperaría un cambio […] que se faga con toda esa lealdade institucional, con todo ese rigor e con toda esa seriedade, que significa sentar a falar”, concluíu.
