A alcaldesa de Santiago, Goretti Sanmartín Rei, manterá ao longo desta semana unha serie de encontros coas candidatas á Reitoría da Universidade de Santiago de Compostela, coincidindo co proceso electoral que se está a desenvolver na institución académica.
Segundo informou o goberno local, as reunións foron solicitadas polas propias candidatas, que teñen como obxectivo trasladarlle á rexedora municipal os proxectos cos que concorren ás eleccións, así como presentar os seus equipos de traballo. Nos encontros tamén se abordarán as principais liñas de colaboración entre o Concello e a universidade que cada candidatura aspira a impulsar, con especial atención a afondar na relación institucional entre ambas as dúas entidades.
Dende o Concello sinalan que estes contactos se enmarcan na vontade do executivo municipal de manter unha relación fluída e continuada coa USC, baseada no diálogo institucional e no respecto á autonomía universitaria. Esta filosofía, explican, é a mesma que rexe as relacións do goberno local co conxunto do tecido social, económico e asociativo da cidade.
A rolda de encontros desenvólvese nun momento clave para a universidade compostelá, inmersa no proceso de elección da súa próxima reitora, e sitúa novamente no centro do debate a colaboración entre a cidade e a súa principal institución académica, un vínculo histórico considerado estratéxico para o desenvolvemento de Santiago de Compostela e da súa contorna.
