A quenda da mañá deste domingo da Policía Local de Santiago de Compostela funcionou con só dous efectivos —un inspector e un oficial— malia que estaba previsto contar con oito axentes. A redución produciuse despois de que os outros seis policías comunicasen diferentes “indisposicións” ao longo da mañá.
Segundo explicou o Concello de Santiago, esta situación obrigou a adoptar medidas excepcionais para evitar un novo peche do túnel do Hórreo, que sería o cuarto nas últimas dúas semanas. Para garantir a vixilancia da infraestrutura, o goberno local recorreu á empresa concesionaria do mantemento do túnel, que mobilizou persoal propio para asumir esta tarefa, da que habitualmente se encarga a Policía Local desde a Sala de Pantallas.
Fontes municipais detallaron que os primeiros avisos se produciron antes do inicio da quenda, cando tres axentes comunicaron que non podían incorporarse. Posteriormente, pouco despois das 09:00, outros dous policías trasladaron a mesma circunstancia. Ao redor das 10:00, foi o responsable da Sala de Pantallas quen informou tamén dunha indisposición, deixando a quenda reducida a dous efectivos operativos.
Esta situación produciuse no marco do conflito laboral que manteñen a Policía Local e o corpo de Bombeiros co Concello polas súas condicións de traballo. Entre as principais reivindicacións figura a mellora da organización das quendas e, especialmente, a regulación das horas extra, das que se viña botando man para cubrir o déficit estrutural de persoal en determinados servizos.
As mesmas fontes indicaron que as negociacións entre o Goberno local e os representantes destes servizos municipaiscontinuarán nas próximas semanas. Un dos puntos centrais pendentes de acordo é a contía das horas extraordinarias, identificada como o principal foco de discrepancia cos sindicatos.
