A Universidade de Santiago vivirá este xoves 11 de decembro unha nova xornada de debate arredor do proceso electoral á Reitoría. A Asemblea de Investigadoras de Compostela organiza un acto no que estarán presentes as catro das cinco candidatas que concorren aos comicios: Rosa Crujeiras, Maite Flores, Alba Nogueira e María José López.
A convocatoria, dirixida ao conxunto da comunidade académica, terá lugar ás 16:30 no Salón de Graos da Facultade de Ciencias Políticas e Sociais. Segundo expón a entidade organizadora, o encontro pretende ofrecer un espazo para coñecer de maneira directa as propostas dos diferentes equipos en ámbitos como a gobernanza universitaria, a xestión económica, as políticas científicas e de persoal, así como a visión das candidatas en relación coa lingua e a cultura na USC.
A Asemblea subliña o carácter aberto da sesión e anima ao alumnado, persoal docente e investigador e persoal de administración e servizos a participar nun debate que considera “ineludíbel” para reflexionar sobre o futuro inmediato da institución compostelá.
