A portavoz do Goberno local de Santiago, Míriam Louzao, confirmou que ao longo deste luns o Executivo municipal remitirá unha proposta formal aos sindicatos da Policía Local e do Servizo de Extinción de Incendios co obxectivo de avanzar na resolución do conflito laboral aberto nas últimas semanas.
Louzao explicou que esta comunicación chega despois de que o pasado venres, 21 de novembro o Pleno aprobase o pago das horas extraordinarias pendentes, que serán incorporadas na nómina correspondente a este mes. Ese primeiro paso, apuntou, permite agora ao Concello centrarse nas demais reivindicacións trasladadas polos traballadores.
Segundo detallou, o Goberno local prevé convocar nos próximos días unha reunión cos representantes sindicais para avaliar a proposta enviada e continuar coa negociación. “Temos previsto convocar unha xuntanza en breve para valorar o documento e confiamos en poder chegar a un acordo canto antes para volver á normalidade”, afirmou.
A concelleira subliñou que o Executivo municipal mantén activo o traballo interno para analizar o conxunto de peticións e buscar unha saída estable ao conflito. Recordou, ademais, que a situación actual “é herdada e responde a un problema estrutural arrastrado desde hai anos”.
Louzao incidiu en que o obxectivo do Goberno é dar resposta ás demandas inmediatas e, ao mesmo tempo, impulsar medidas que permitan mellorar o número de efectivos e evitar que episodios similares se reproduzan no futuro. “Queremos solucionalo de maneira integral, atendendo ás necesidades dos corpos de seguridade e garantindo un funcionamento estable dos servizos municipais”, concluíu.
