O Concello de Santiago mantivo este luns un encontro coas directivas de dez asociacións veciñais da cidade históricapara presentarlles e recoller as súas observacións sobre a modificación puntual do Plan Especial de Protección e Rehabilitación da Cidade Histórica (PE-1), actualmente en fase de exposición pública tras a súa aprobación inicial.
O concelleiro de Urbanismo e Centros Históricos, Iago Lestegás, explicou que esta modificación busca “manter e reforzar o uso residencial que caracteriza a cidade histórica”, así como promover o comercio de proximidade, favorecer novos usos que contribúan á súa dinamización e garantir o equilibrio entre os espazos orientados á veciñanza e aqueles vinculados ao turismo.
Durante a reunión, celebrada co obxectivo de fomentar o diálogo e a participación cidadá, o edil subliñou que o proceso de exposición pública está acompañado dunha comunicación directa con todos os propietarios de inmobles da zona, aos que se lles remitiu unha carta informativa. “Queremos que todas as persoas interesadas poidan facer as súas achegas e propostas antes da aprobación definitiva”, apuntou Lestegás.
