A sección sexta da Audiencia Provincial da Coruña celebrará o vindeiro xoves 17 de outubro un xuízo no que se sentará no banco dos acusados un home ao que a Fiscalía atribúe un delito de estafa, ou alternativamente de branqueo de capitais, por enganar presuntamente a un veciño de Santiago de Compostela durante a compra dunha autocaravana.
Segundo o escrito de cualificación fiscal, os feitos remóntanse ao Nadal de 2020, cando a vítima, residente en Santiago, atopou en Facebook un anuncio dunha autocaravana en venda por 6.000 euros. O Ministerio Público sostén que o acusado, “só ou en coordinación con outras persoas”, mantivo comunicación coa vítima a través de mensaxes nas que se gañou a súa confianza e lle fixo crer que lle entregaría o vehículo en Santiago unha vez recibise o pago.
Para dar aparencia de legalidade á operación, o procesado envioulle ao comprador documentación falsa, incluíndo un suposto contrato de compravenda e unha factura proforma. Convencido da veracidade da oferta, o comprador transferiu a principios de 2021 os 6.000 euros a unha conta bancaria titularidade do acusado, que posteriormente realizou reintegros parciais da cantidade.
O Ministerio Fiscal engade que, de non demostrarse a participación directa do acusado na “manobra enganosa”, este podería ter incorrido nun delito de branqueo de capitais, ao recibir e retirar un diñeiro do que “era consciente de que non procedía de actividades lícitas ou asumindo a alta probabilidade de que non o fose”, presuntamente a cambio dunha compensación económica.
A Fiscalía solicita para o procesado un ano de prisión e o pagamento da responsabilidade civil correspondente pola cantidade defraudada. O xuízo terá lugar na sede da Audiencia Provincial da Coruña, con sede no Pazo de Xustiza.
